«Ливонские обременения» и русско-ганзейская торговля в преддверии ливонской войны - Марина Борисовна Бессуднова

sunder des denn vorordenten gesanndten vollenkamen macht in Lifflandt mit denn steden ßick thoverglicken gegeven werden muste, iß dennoch denn heren des uttschotes bevalen worden, die instruction etlicher mathenn tho stellenn, unnd ßust annder puncte halven ßick tho verglicken.

So vele de persohnen wordorch die beschickung tho donde, belanngt iß vor gutt angesehen, dath ein jeder deputerde statt eine Radesperßohnn schickenn möge.

Vorher dath verlach der uncosten thom geschencke unnd ßunnst thor Legation vorerst genohmmen ßolle werden, wile derwegenn ein ßonderlicker Artickel von der Contribution tho betalinge ßolchen angewandten uncosten uthgeschreven, iß ßolckes beth tho radtschlagung dessulven reservirth etc.

6

(28/6, fol. 27v.) Extract uth dem Recess Anni 1559 Jacobi Apostoli belangende die handlung so tho der tyt mith des herren Meisters tho Lifflandt unnd der steder Riga unnd Revell Gesandtenn, der Erbarnn allgemeiner Hense stette affgesandtenn geplegenn etc.

(28/6, fol. 28v.) Extract uth dem Recess Anni 1559 Jacobi Apostoli.

Negest dissem iß der Erbarn van Revell anthwortschrifft, so denn vormiddach, wo gemelt, overgegevenn, denevenn einer andern schrifft, darinn Ursachen angetagenn, wordurch ßie ohre uthliggere jegen die Wyburgesfarer utthorusten bewagenn, unnd des herren meisters bestellung, dergelicken eine copie der verdracht, so hir tho Lübeck twischen beyden parthen upgerichtet, verlesenn wordenn. Als nu die herr Bürgermeister tho Lübeck soliche schriffte dem wedderparthe notturfftiger jegenanthwurt halvenn thothosteilen begert, sollichs averst ane vorgaende Deliberationn van denn herrnn Radtsgesandthen nicht hefft können bewilliget werdenn, sint die herrenn tho beidenn syden darup affgetredenn.

Darna als sie wedder binnenn gekamenn, iß ohnenn durch den hern doctor van Collen dusse meynung angetzeigt.

Och hedden die herrn Gesandtenn uth vorgebrachter clage unnd anthwurt die errunge beyder Raethe vernhamenn unnd bewagenn, dath na gelegenen sachenn nicht radtsam noch nodich tho ferner disputation mehr schriffte thoproducierenn, diewile dan hirbevorn denn Erbarnn van Revell die begerte schrifft der jegendeele affgeschlagenn, so moßtenn sich ock die Erbarn van Lübeck nicht beschweren, dath ohnen der vann Revell anthwurtt dithmahl ock nicht folgenn konde, sovele averst den Principali handeil belangede vermuchte die Confoederation,

(28/6, fol. 28r.) dath alle twispaltt, so twischen den Steden mochten infallenn, allererst durch beydersith frunde, offt ße gütlich thoverdragenn, solde verßicht werdenn, derwegenn wolde sich geboerenn, dath dusse weg erst vorgenhamenn wurde, die herren Gesandtenn weren erbodich, sich dartho gerne gebrucken tholatenn, unnd diewile im uthschrivenn desses dages ein Artickell vann der Segellation up Wyborch mith ingestellet, So were der herrn Radtsgesandtenn frundtlich ansinnen, dath dieselve Artickell hirnegest muchte vor die handt genamenn unnd darinn consultert werdenn.

Hirmith sint beide parthe thofredenn gewest unnd hebben ohnenn tho guetlicher underhandlung stede thoernennenn begert, sollichs averst beyder sitz tho gefallenn gesteh, welcke stede ein jeder parth sulvest erkesenn woldenn. jedoch hefft die herr burgermeister tho Lübeck vermeldet, dath der Wyburgesfarer schrifft, welche die vann Revall nu so flitich gefordert, ohnenn inn die herberge thogeschicket gewessenn unnd sie diesulve nicht heddenn annhemenn willenn.

Unnd als idt hiermith ann den avendt gelopenn, iß die handeil der Wyburgischenn Siegellation beth thom negestenn suspendieret unnd alleinenn eine Supplication schrifft ann die gemeine Radtsgesandtenn Anthony Kolers jegen Hans Loffhagenn, darinne umb vorschrifft ann die Fürstenn tho Pommernn gebedenn, die ohme ock decerviert wordenn, verlesenn unnd denn dach darbey verblevenn.

(28/6, fol. 29v.) Maendage Morgens den 28th Augusti tho 7 schlagen, als des herrn Meisters tho Lifflandt obgedachte geschickede ingefurdert, iß ohnenn thosampt denn Erbarn van Riga unnd Revell durch denn herrenn Collinischenn doctor nafolgende anthwurt thogelicke gegevenn.

Der Erbarn allgemeiner Antze stett Gesandten heddenn vergangenn jhars ock desser tyt vann des hochwerdigenn unnd grotmechtigenn Fürsten unnd herrenn, herrenn Meister tho Lifflandt unnd der beydenn stede Riga unnd Revell gesandthen den beschwerlichenn unnd bedrofflichen thostandt der Lande Lifflandt, wo die nach der lenge verteilet, unnd wath darup gesicht unnd begert werdenn mith bedrevedem genuthe angehoret unnd vernhamen, droegen ock der allen ein getruwlich unnd nachberlich mithlidenn.

Unnd wowoll sie solliche allerhogeste beschwerunge, darbeneven ock die macht unnd gewaldt der fiendes mith aller umbstendicheit tho gemoete getagenn ock bewagen unnd betrachtet, wo unnd welcher gestalt dem bedrovedenn lande unnd stedenn uth sollicher last, bedruck unnd geschar wedderumb tho fredt unnd ruhe mochte verholpen werden.

So befinden sie doch dath die Sachen groet unnd hochwichtig, diewile denne dath Landt eine Provintz des hilligenn Romischenn Rykes ock andern umbliggenden Potentathen, Kunnigen, Fürsten unnd herrenn, Stenden unnd steden mith darann merklich gelegenn, also men dem fiende (welchs Godt gnediglich wolde verhodenn) sinen willen thofullen bringenn solde, verhenget unnd gestadet werden.

(28/6, fol. 29r.) Dath ohnenn allenn daruth unwedderbringlich unradt unnd verderff erfolgenn wurde, we ein jeder verstendiger by sich woll thobedenckenn, unnd nu die Erbarn gesandthen noch nicht vermercket, wes die Rom. Key. May. sampt Chur- unnd Fürstenn ock den gemeinen Stendenn des hilligenn Rykes dergelickenn die andern negstbelegene Potentathen, Kunnige, Fürsten unnd herrenn bescheidentlich die Kon. May. tho Polen, Dennemarckenn, Schwedenn, die Fürsten tho Prussen, Pommern unnd Meckelburg mith anderenn so bethanher des Landes, in Sonderheit vor andernn genatenn unnd noch henfurder, wenn die Allmechtige frede unnd ruhe wedder gevenn wolde, genetenn wurdenn, tho erreddunge der Landes mith trost, hulp, bystandt unnd entsettinge thodoende geneget unnd ock, gefatet edder nicht, ane welchs der Erbarn steder vermugeliche hulpe inn betrachtung des fiends groter unnd beharlicher macht weinig edder gar nicht ersprießlich ßinn wurde. So kondenn sich disse Erbarnn gesandthen eher unnd thovornn sie sollichs gehortt unnd erwagenn, ohres gemuets unnd bevelch nicht erclerenn noch entschlutenn. Wen sie averst des notturfftiglich unnd bestendiglich berichtet wordenn, alßdenne woldenn sie sich ohrer herrenn unnd Overnn befelchs ferner vernhemenn lathenn.

Up disse anthwurtt hebbenn die geschickedenn bedencken, gebeden unnd erholden, wo sie nu allso enthweckenn, thosampt den beydenn Stedenn Riga unnd Revell, iß middeler wile des Hertogenn tho Pommern, Herren Bernims Vorschrifft

(28/6, fol. 30v.) gelesenn wordenn vor einen siner f. g. underdanen Gerdt Stevenn genandt mith dessulvenn Steven bygefogeder Supplication jegen den Erbarn Radt tho Lübeck etlicher enthmaulenn Lakenn unnd eines Schepes halvenn, des denne einem Erbarnn Radt tho Lübeck die veranthwordung bevalenn wordenn.

Als nu die Geschickedenn wedder ingekamenn, hebben sie negest gnediger ohrer Fürstenn unnd dienstlicher ohrer Personen dancksagung der vermerckeden