«Ливонские обременения» и русско-ганзейская торговля в преддверии ливонской войны - Марина Борисовна Бессуднова

Hirup lathenn sick die van Revell inn anthworde vernhemenn, dath ohnenn wundert, dath die copman daraver klaget, dan so weinich die van Lübeck seegenn, sie ock ohre stadt mith nichte upthoholdenn unnd alle unplicht thostaende.

Item die van Lübeck unnd andere wurden in dem ock nicht hoger als sie unnd sie offt die ohrenn nicht hoger als die copman beschwert unnd gelick die vann Lübeck denn vann Reval nicht fragenn woldenn, wes sie tho ohrer stadt beste up die frembdenn unnd ock ohrenn leggenn scholdenn, sollichs ock nicht gedaenn, do sie die wage verhoget heddenn. So wurdenn sie ock ohre bürgere van ohrenn clagen desto guthwilliger affwisenn, mith dem wasse unnd tallige so tho Dorpte geteckent unnd gewagenn wurde, idt wedderumme by ohnen na dem oldenn geholdenn.

Item sie hadden sich nicht vorseen, dath men sie dergestalt, wie mit der angetogeten hemelicken beschnidinge

(28/4, fol. 14v.) gescheenn, scholde betastet hebbenn, wile sie ohre wage up keine hemelicke beschnidinge geschehet, dan dewile mathe unnd gewichte wen gades gerichte, so wolden sie die gernn sovele mogelich erholdenn, jedoch nicht anders vor die ohrenn als die Lübeschenn koplude. Eth weren ock die punde unnd lede, darmede men vor velen jarnn unnd vor der scherpinge der wage gewagenn unverändert etc. mith bith sie mith sollichenn tholagenn thoverschonenn etc.

Hirup iß tho seggen unnd thoanthworden, wen eth so were als die van Reval schreivenn, dath die punde unnd lode weren unvorandert, lethe men eth darby woll vorblivenn. Eth wurde averst mith gudem gründe in der wicht vele anders befundenn, derhalven moste men den olden Sleper darby bringen.

Item wo eth ock mith dem solte geholdenn worde, quemen die iennigenn, so eth uth den Schepen entpfangenn dagelichs woll in erfaringe.

Item wes van den van Revall angetagenn wurde, vann verhoginge der wage alhir, so were eth mith der verhoginge der wage aldar tho Revall unnd hir tho Lübeck ein seer ungelick dinck, denne tho Revall werth vann einem Schillinge up seß und dortich Schillinge Rigesch verhoget.

(28/4, fol. I5v.) Samt der kenning unnd dem Tornn tho dagedenn unnd dem ungewontlichen upgesettedenn havenn gelde, darmede die Schepe gantz beschwerlich beschattet werdenn als vann vofftich lastenn dre marck Rigesch vann hundert lastenn soß marck. Iß eth Schip groter alßdenne achte negen tein marck unnd so vordann, so vacken sollichs kumpt, moth sodan geldt gegevenn werdenn, welchs vorwar nicht ein geringes ist.

Darup die vann Revall doen anthwerdenn, dath ohnenn der clage des copmans befremdet unnd dath men nicht liden konde, wes einem tho sinem bestenn geschege unnd solde denn copludenn menn so beschwerlich nicht sinn sollich geldt utthogevenn, noch sich dartho vorlangenn lathen, dath die kenninge nicht lichtlich konde affgedaenn werdenn, dann wes noch kortzlich darvann by ohnenn gehandelt, unnd wes sie darentkegenn vor frygheit by sich vorgunt, were ohnenn woll bewust unnd soldenn derhalvenn sick mith nichte so hochlichenn beclagenn etc.

(28/4, fol. 15r.) Ist hirup denn vann Revall anthotogenn unnd thoseggenn, dath die vann Lübeck sich nicht geweyert, wie ock noch wes ohnenn der kenninge halvenn tho doende geboert, dath sie overst ohre havenn unnd bolwerck underholdenn unnd derhalvenn solliche ungewontliche beschattinge up ohre Schepe gelecht werdenn scholde, wer ohnenn beschwerlich unnd ock nicht doenlick mith beger sollichs affthostellenn etc.

(28/4, fol. 16v.) Vann wegenn der beschweringe, so dem copmanne mith dem terra der tallich fathe bejegent, wor mith die copman ock merklich vernadeelt wert etc. derhalvenn umme geborlichenn wandell thoverschaffen biddende.

Worup die vann Revell geantwordeth inn ohrenn schrifftenn, dath uth woll seer guth were, dewile die hir nicht beredet, men des einenn wandell hebbenn khonde, woldenn ock gernn so vele doenn helpen als ohnenn mogelich etc.

Tho seggenn, dath menn sich des noch foelt mercklich beschwert, derhalvenn ock thoforderenn, umme mith denn vann Dorbte unnd thor Narve darann tho sinde, dath sollich beschwer affgeschafft unnd die copmann darmede unvornadelt blivenn möge.

(28/4, fol. 16r.) Up denn Artickell, dath eth soldt, so vann hieraff up Revall werth geschepet, aldar plach frygh thowesenn unnd keinenn tollenn thogevenn, unnd doch nunn vann jder last solttes, wenn uth uthgeschepet wert, einenn ferdinck gevenn moth etc.

Aver welckenn Artickell die vann Revall henghann, unnd densulven unbeantwordet lathenn.

Ist nochmals tho forderenn, solliche beschattinge wedder affthostellenn.

(28/4, fol. 17v.) Endtlich beclaget sich ock der copmann, dath newlich am vorgangenn winter tho Dorpte beyde bürgere unnd gesellenn darsulvest hebbenn mothenn certicerenn, worup ohnenn ock vann dem borgermeister aldar tho Dorpte eyn teckenn gegevenn, dath die gudere so tho Dorpte vann den Russenn verhütet, ohnenn denn burgernn unnd gesellenn sampt Rige unnd Revell aliene thobehordenn unnd dath nemandes so mith ohnenn maschuppie hebbenn, eth sy binnenn Lübeck offt anders wor, darann parth offte deell hedde, woruth clerlich thovermercken, dath die Lifflandeschenn steder nicht anders bedacht sinn, dann denn copman thom gründe thovorderven.

5

(28/5, fol. 18v.) Extract aus dem Recess anni 1554 Ermitstis.

(на полях: de uprechtung des Nowgardisch Cuntors unnd befurderung einer Legation in die Muscow belangend).

(28/5, fol. 19v.) Extract aus dem Reces vonn anno 1554 vonn dem Nowgardischen Cunthor.

Unnd iß darup eindrechtiglich bewilliget, diweile mann noch vor der hanndt uth allerley orsakenn nicht bequemlich up de stede der Residenten efft man die tho Brügge edder Anthwerpenn holdenn wolde, schluthenn konde, dath vorerst de sake des Naugardischenn Cunthors getractirt, beradtschlaget unnd darinn geschlothenn, unnd tho der behuff der her Rigische Bürgermeister Bürgermeister (sic!), weß der drier Lifflenndischen steder bedencken unnd bevelch were avermals gehört werden mochte.

Worup sine E.w. erstlich sovele de wedderuprichtinge des Nowgardischen cunthors belanngt vonn wegenn seiner obern unnd oldesten angetzeigt, dath ßich die Erbarn stede uth dem Receß anno etc. 49 jungst alhier upgerichtet uth des burgermeisters hern jurgen Palen, damals Rathen vonn Rige, derwegenn ingebrachten bevelich unnd warhafftigenn bericht der geferlicheit halven genuchsam thoerinnern hedden, unnd erhelt ßich de

(28/5, fol. 19r.) sake noch alßo unnd nicht annders. Zu deme wolde ganntz schwär unnd ßorglich sein, dath de wahr als werck unnd andere Pelterie, so vormals upt cunthor tho Nowgarden gebracht unnd darmit der