«Ливонские обременения» и русско-ганзейская торговля в преддверии ливонской войны - Марина Борисовна Бессуднова

drat, allun, figenn, rossinenn offt wath uth vor gudere werenn, nichts buten bescheiden mochte. Hie solliche gudere uth den Schepenn lathenn schepenn nha der Narve, Dorpte offte Newgardenn, wor hie die gudere henn hebben wolde, sunder allenn beschwer.

(на полях: 4) Item menn findt och wider inn allenn olden schrifftenn der jennigenn, die solt plegenn tho schepenn, dath ein jeder sin soldt mochte upgethenn tho Revell inn die kellere unnd uthsulvige wedder afschepenn na der Narve, nha Dorpte offt wor die copman sollichs hebbenn wolde, tho Newgardenn, inn Schwedenn edder in die Nu, dewile dan sollichs vann olders herbrucklich unnd fryg gewesenn, ock mith olden loffwerdigenn bokenn, schrifftenn, reckenschuppen.

(28/1, fol. 5r.) Belangende die Russesche kopenschop etc., de jeher unnd allewege freygh gewesenn unnd menn doch nun inn Lifflandt inn den stedenn nicht thogestadenn vermeent etc. der orsachenn wie sich inn ohrenn anthwerden vormerckenn lathenn, dath nachdem es vann olders gebrucklich unnd nicht ane ripem rade unnd hogem bedenckenn vormoge ohrer Privilegienn ohnenn gnediglich gegevenn unnd vann ohrenn landesfurstenn confirmert. Ock ohrer Stadt Revall burspracke notturfftiglich verseenn, dath gast mith gaste tho kopschlagenn mith nichte schall vorgunt noch thogelathenn werdenn. So gedechtenn sie ock daraver thoholdenn unnd sollichs hinfuro nicht thogestadenn, wente sie densulvenn Artitickell tho allenn eerenn vermöge solicher ohrer Privilegienn unnd stadt burspracke woll kondenn verbiddenn unnd erholdenn.

Item eth wurde nu mheer ogenschinlich unnd wer genoch am dagk, dath mith allen nichts angeseenn noch betrachtet wurde, dath sie

(28/1, fol. 6v.) als die ingesetenn bürgere inn tyt der nott unnd sunst eines jdernn gelegenheit unnd der geböte nha by denn landenn Lifflandt ethwas doenn unnd upsettenn mostenn, die havenn boiwerk, wege, torns, welle unnd murenn beterenn unnd diesulvigenn mith notturfftigem gebuwete versorgenn, ja liff unnd levendt darby upsettenn, wor entkegenn die overseeschenn unnd frembde se doch ghar unbehorlicker wise handeldenn, wenner die ohrenn budell woll gefullet unnd ohnenn die nheringe deger unnd all enttagenn unnd sick vann dannenn begevenn gar nichts dedenn.

Item mith wath menninge unnd veelheit bavenn der gemeinenn steder Recesse, die sie mith schwarenn uncostenn heddenn helpenn, uprichtenn unnd belevenn mothenn, daraver sie ock gerne heldenn, allerley fromede gesellenn darhenn kemenn, wher nicht tho seggenn, dann woll thobedenckenn, fft menn densulvenn, die doch nicht alle sich tho Lübeck offte tho Revall, dar sie ohre nheringe gewinnenn settedenn, borger-

(28/1, fol. 6r.) — licke frygheitt gunnenn konde etc. mith mheer andernn unnd lengerenn redenn.

Darup ist anthotogenn, dath sovele denn punct belanget ock inn olden reckenschoppen unnd brevenn, dewelcke aver sestich unnd seventich larnn oldt sint, lütter unnd clerlich befundenn werth. Ock darnefenst velenn ludenn alhir tho Lübeck dergelickenn tho Rige, Revall unnd Dorpte, dewelcke noch im levende sinn, ghar woll bewust, dath die Russesche kopenschop denn vann Lübeck unnd andernn inn der Hanse allewege freyg gewesenn, also dath sie mochtenn mith denn Russenn handelenn unnd buten tho jeder tyt avents unnd morgens, ock sowoll butenn als inn dem Respute tho Rige, Revell, Dorpte, thor Nerve mith allerley whare als waß, werck, marckenn, sabulenn, Menckenn, lastkenn, hemelenn, flaß, tallich, hennip unnd sustz mith allerley hudenn unnd whar, so die Russenn uthbrachtenn, nichts uthbeschedenn.

(28/1, fol. 7v.) Sollichs ist ock dorch erbar, frame, uprichtige unnd leffwerdige lüde der eins deels Radeß verwandtenn unnd die mehrer deell borgere tho Lübeck sint, inn jüngster vergaderinge der erbarnn gemeiner Anze Steder beschedentlick. Anno etc. XL. vor denn hernn Radessendebadenn, darsulvest upen Radthuse vorsamblet warhenn die upgemeltenn Personen geeschet unnd gefordert, die welcke ock inn denn landenn Lifflandt aver dortich unnd vertich jarnn ungeferlich min offte mheer gehantert unnd gehandelt hebbenn, mith aller umbstendicheit clerlich unnd öffentlich betuget unnd bekandt wordenn. Nemblich dath die Kopenschop mith denn Russenn inn allenn Stedenn ock binnenn Newgardenn stetz unnd allewege frygh gewesenn, welckere tuchenisse unnd bekandtniß ock allenthalven inn den Receß so darsulvest upgerichtet clerlich ist, verteickent wordenn, inn aller mathenn, wo uth dessem hirinne vorwartem Extract desulvenn Recesses itzigenn Artickell belangende klerlich thobefindenn.

Ludende wo folget.

2

(28/2, fol. 8v.) Extrahert uth dem Recesse gemeiner Antze Steder anno etc. XL jungest binnenn Lübeck vorgadert. Folio 45.

Belangende die frye kopmanschup mith denn Russenn unnd andernn etc. inn denn Landenn Lifflandt.

Vor denn gemeinenn der Erbar Steter Radessendebadenn sinn erschenenn die Erbarnn wolwisenn unnd Ersamenn Radtmanne unnd loffwerdigenn Bürgere tho Lübeck wo hirna benhomet.

Erstlich herr Iohan Stoltervoth radtman unnd hefft gesecht, dath hie binnen Reval gebarnn were unnd inn Lifflandt tho Riga, Dorpte, Reval unnd thor Narva inn die vertich Jar gehandelt hedde mith Russen unnd andernn fryg gekoepschlaget unnd nhe gehört, dath jemandes inn denn Stedenn dar vor, dath hie mith denn Russenn gekopschlaget geweddet hedde, ane die uth denn Schwedeschenn schutenn vellichte ann botter unnd anders vorkoep gedaenn unnd wher, dathsulve noch ser geringe gewessenn. Item

(28/2, fol. 8r.) die hockers werenn ock ein mall tho Revall gekomenn unnd heddenn vann denn Russenn etlich was gekofft, dath sie mitgebracht. So hedde ohnenn die Radt nicht gunnenn willenn, solch waß aldar thovorkopenn oder wechthoschepen, sunder heddenn dar stracks mede uth der Stadt mothenn ane dath ohnenn dorch grote vorbede nhagegevenn wordenn, so vele thovorkopenn, dath sie die vorlude mede stilledenn unnd heddenn forth, dath ander mothenn nha Rige forenn unnd sulvest mit thohenn.

Darnha hefft gesecht her Herman van Doren, dath hie ungeferlich acht unnd twintich Jhar vor sick unnd andere inn Lifflandt gehandelt unnd hedde nie anders ersport, denn dath die kopenschop mith den Russenn fryg gewesenn inn allenn stedenn ock binnenn Nowgarden, wo denn die Bürgermeister her Hinrick Ulenbrock dessulvenn so woll alse hie unnd andere mithgenhatenn hedde, hie where ock sin levelanck umb khein wedde angesprackenn, noch sins wethens jemant anders anhe die mith Schwedenn unnd Vinnenn verfenckliche kopenschop bedrevenn heddenn.

Herr Albrecht Clever hefft gesecht, dath hie inn

(28/2, fol. 9v.) allenn Stedenn dar gewesenn in negenn unnd twintigste Jar unnd hedde gehandelt mith den Russenn, dath ohme ein penninck nicht where affgenhamenn, dan uth hadde einem jedernn freig gestaenn unnd wolde sich vorwilkhorenn vor einenn jedernn penninck, die ohme muchte affgeschattet synn, einenn gülden thogevenn, dar